Internet
Meer sinn digitaal
- hochgeladen von Walter Rupp
Wer im Indernet e Määl-Adress hott, bei demm gheeren nervische Määls zum Alldaag - die so genannde Spämms. Jeden Daag kummen etlische Briefe, die ähm dezu verleide wollen, irgendwas zu kaafe, dess merr nit will und nit braucht odder noch schlimmer, die ähm perseenlische Date abluxe wollen. Besonders gfroogt sinn naddierlisch die Bankdate.
Die meischde Spämms werren bei uns vumm Filter rausgfischt unn gsammelt ogezeigt. Do muss merr halt immer genau durschgugge, ob nit wass debei iss, dess merr drotzdem sehe will odder wu merr sogar schunn lang druff waad. Drotz demm Filter sinn als oft noch zweifelhafde Määls debei, die gladd durschkummen, awwer irgendwie mysteriös aussehen. Neilisch hämmer widder so Ding roigriggt. Dess war e Noochrischt vunn demm Internet-Bezahldinnscht PayPal. Die hänn gschriwwe, es geeb Uschdimmischkeide uff unserm Nutzerkondo unn isch soll misch jetzt iwwer enn Link bei ihne oilogge unn dess Kondo verifiziere , was so viel hääßt wie, isch soll mit moine Date beweise, dass isch isch bin. Uff de erschde Bligg hott dess alles ganz escht ausgsehe - die Farwe hänn ah gschdimmt - awwer - Achdung - die Imääladress war nit die, mit deere ich bei PayPal gemeldt bin. Also war do wass faul! Dann seh isch de zwädde Fehler - unn dess war de Hammer:
Anschdatt "Hallo Walter Rupp" war do zu lääse: "Hallo alter Rupp".
Noochdem isch ferrdisch war mit Lache bin isch awwer dann doch e bissel noochdenklisch worre. Eigendlisch war dess jo gar känn Fehler --- weil --- do wu se rescht hänn, hänn´se rescht.
Autor:Walter Rupp aus Frankenthal |
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.