Ein Gedicht von Hartmut Hetterich

Neustadt und die Elwetritsche

Neustadt. Anlässlich des bevorstehenden 1. Elwetritscherennens in Neustadt erinnert sich Hartmut Hetterich, ehemaliger Dirigent aus Neustadt, an ein Elwetritsche-Gedicht, das er zur Fasnachtsfeier des Gesangvereins Neustadt im Jahre 1986 verfasst hat. Rechtzeitig zum Start der Fabelwesen am Sonntag in der Innenstadt hat er uns seine Verse zukommen lassen, die da lauten:

Neustadt und die Elwetritsche
Melodie: Heile, heile, Gänschen

In Neustadt, do gebts viel zu seh,
die Stiftskerch unn den Markt,
de Kubyhof, die Metzgergaß,
die Alt Poscht unn die Haardt,
de Storcheturm, die Brunnestroß,
de Klemmhof newerm Schütt,
der is jetz wieder schää unn groß,
mim Brunne in de Mitt.
Die Elwetritsche sinn dort all
so goldisch, ja, des muß ääm gfall.

Refrain:
Neustadt an de Woistroß
in de goldisch Palz,
Gastlichkeit schreibst du groß, (neuer Werbeslogan)
jedem hier gefallts.
Wer äämool doo war, s’is e Glück,
kummt immer – wieder – gern – zurück.

Die Nüwenstadt iss, wie mer wäß,
an Winzinge gebaut,
unn hott dem alte Grafesitz
die Vorherrschaft geklaut.
Guck mool die Elwetritsche aa,
brauchscht bloß e bissel Glück,
doo schbautzt die äänd die anner aa
unn die net faul zurück.
Des schääne Schauspiel, sapperlott,
versteht bloß, wer’s mool gsehe hott.

Refrain

Unn Woistroß, o, wie klingt des Wort,
dass gut mers merke kann,
hott die dem äänzisch schääne Ort
ehrn Name gewwe dann.
Do gehscht uff Elwetritschejagd
am Speyerbach entlang,
baß joo gut uff, dass kääni lacht,
sunscht werds der Angscht unn Bang.
Vielleicht passierts in deere Nacht,
dass dich e Elwetritche jagt.

Refrain

Vun alle Neistadt uff de Welt
hab ich nur meins im Sinn!
Ich gebbs net her fer alles Geld,
weil ich joo fun doo bin.
Die Elwetritsche findscht halt bloß
in unsre schääne Palz,
drum bin ich hier, nix loßt mich los,
mein Neustadt, Gott erhalt’s.
Die Fabeltierscher sinn so nett
unn fabulieren um die Wett.

Refrain