Beinoh weeren se verdorscht !
- hochgeladen von Walter Rupp
Im Friehsummer iss jo immer die bescht Säsong vunn de große Gaademärkt. Alles wass die Welt an Flora zu biede hott, werrd de Kundschaft bräsendiert (ausgenumme Darmflora). Do werrd nit gegläggert, do werrd geglotzt. Der Duft in denne großfläschische Ausschdellungshalle nimmt ähm fascht die Lufd weg. Sooo e Vielfalt an Blanzesorrde unn Bliede unn Düft, dess iss jo fascht nit auszuhalde. Do kännt mer grad alles oilaade. Besonders die bliehende Blumme greischen all: "Nämm misch mit!!!" Wer kann do schunn widderschdehe. Kä Wunner, dass die Oikaafswäggelscher meischdens voll belade sinn. Do werrd oikaaft uff Deiwel kumm raus, meischt mä wie in de Kofferraum basst. Beim Verschdaue geht´s dann awwer als nit ganz so sanft zu unn die zarte Blummeschdeggelscher erleiden ab unn zu enn Arm- odder Bääbruch. Dann liggen in denne Wägge am Schluss noch abgebrochene Schdängelscherr mit Bliede unn verdärren glääglisch in de Sunn. Känner guggt nooch denne, weil se so armseelisch verdriggelt rumbambeln unn merr denkt, dasse beschdimmt schunn de Leffel weggschmisse hedden.
Unn weil se uns als so arg lääd duun, nämmer alsmool e paar mit Hääm in unser "Intensivschdazion ferr notleidendes Griezeig". Unne frisch abgschnidde - in e Wääsel mit frischem Wasser gschdeggt ---- unn korz dennoo fangen se a zu schnaufe unn rabbeln sisch langsam widder uff. Am negschde Moje isses e wahrie Frääd, die zu bedrachde. So e glää Schdraisel aus doodgeweihde Blimmelscher kann ähm mindeschdens genau so die Schimmung heewe wie e Edelroos mit goldne Dorne. Die Naduur macht jo arg viel, awwer manschmool kammer ah e bissel noochhelfe. Do fiehlt merr sisch, wie wammer die Welt gerett hett - wennigschdens e ganz, ganz, ganz gläänes Schdiggelsche.
Autor:Walter Rupp aus Frankenthal |
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.