Inspiriert von Frau Fuchs' Gedicht "Die Schublade"
Moi Wäschkommod
'S konn jedi Fraa e Lied druf singe,
desweche will ich's ufs Babier heit bringe:
'S gibt bestimmt noch mehr im Haus,
was klemmt, es is en Graus!
Am schlimmschde is die Wäschkommod,
do is fascht alles aus'm Lot!
Des war net immer so, ich muss es saache,
in letschder Zeit muss ich awer klaache:
Strumphose, dick un dinn
ehrlich - es is alles drin!
Kompressionsstrimp sin ach debei,
statt viere sins awer nur noch drei!
Socke, Kniestrimp, korz un long,
wenn ich jetzt was such, dann werd mer's bong!
Schlipper, ach in schwarz un weiß
stapeln sich do, klä un groß im Preis!
BH's, des wäß ich, nix is mer fremd,
s'is auch so e sach, wo's immer klemmt!
Zieht mehr do en weiße raus,
fallen all die Onnere ach mit naus!
Macht mer schnell die Deer donn zu,
do klemmts ach, s'is Schluss mit de Ruh!
Ich hab's mit Kerbscher probiert, die mer so kennt,
do isses ach bassiert, ach die hen geklemmt!
Ball hab ich mich dann durchgerunge
un hab die Lösung fer mich gfunne:
Zwä große Schublade im Kläderschrank
sin halwer leer, Gott sei Dank!
Während dem Lockdaun in de Coronazeit,
do wars dann soweit:
Die Schlipper net gschdabelt, sondern gelecht,
die BH's drapiert, 's war e Feschd!
Die Socke un die Strimp hän schä ihrn Blatz,
des Oziehe morchens geht jetzt ratz-fatz!
Dem Corona trotz allem sei Dank,
hab ich jetzt Ordnung in moim Schrank!
Ich muss mich jetzt ach nimmi schämme,
moi Schublade dun nämlich net klemme.
Autor:Annelie Schulz-Joa aus Neustadt/Weinstraße |
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.