Wer kennt de "Roode Weg" in Flomerschemm ?
- hochgeladen von Walter Rupp
Wammer sisch bei "Google-maps" die Kaad vunn Flomerschemm unn Ebbschdää bedracht, do findt merr an de Isenach entlang, uffem Flomerschmerr Tärrää, enn schääne glääne Rad- unn Fußweg. Zwische de Ebbschdää-Flomerschummer Brigg unn de Jahnschdroß isser geteert, laaft dann als Drambelpaad an de Bach entlang als noch weider bis naus an die Audobahn-A61. Er iss bei Fußgänger beliebt unn werrd vunn Hundebesitzer als Entleerungsweg gärn benitzt. Uff dere ganze Schdregg schdeht immer widder: "Roter Weg".
Awwer bloß uff de Landkaad vunn Guugl - nit im rischdische Lääwe unn in kämm Schdadtblaan!
Dess iss merr ah noch nie zu Ohre kumme, obwohl der schunn iwwer 50 Johr an unserm Gaade vorbeigeht. Isch hab ah noch niemand gedroffe, der denn Ausdrugg kennt. Noochfrooge bei de Ortsverwaldung hänn ah nix gebrocht. Wie kummen die Guugls bloß uff denn Name? Hott sisch do jemand enn bardeibollidische Scherz erlaubt odder hääßt der wirklisch so? E offizielles Namensschild iss jedenfalls nirgends zu finne. Dann weer´s jetzt awwer mool an de Zeit, dess noochzuhoole !
Kann misch do jemand schlau mache?
PS:
Jedes Johr im Ogdoower kann merr allerdings e paar Daag denn Name "Roter Weg" guud noochvollziehe - warum? - dess sieht merr uff demm Foddo !!! (äfach uff´s Bild gligge, dann sieht merr ah dess ganze Foddo unn de Weg).
Autor:Walter Rupp aus Frankenthal |
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.