Gedanken eines Pfälzers zu Corona
"Ebbes schdimmt net"
- Symbolfoto
- Foto: Pixabay
- hochgeladen von Ralf Vester
Eppstein-Flomersheim. Das Coronavirus beschäftigt die ganze Welt und wird es wohl auch noch eine ganze Weile tun. Unser Leser Peter Fruth hat dazu ein Gedicht, "die Gedanken eines Pfälzers zu Corona", verfasst:
Ebbes schdimmt nett
Du gehschd an doi Fenschder und guggschd dich drauß um.
´S iss ongenehm warm, ´s schoint jo a die Sunn.
Doch ebbes iss komisch, dich packt so e Gfiehl, kä Auto, kä Leit, ´s iss unheimlich schdill.
Du schbidscht jetzt doi Ohre, heerschd, ob sich was rührt unn bischd a ganz gschbannt, ob nett doch was bassiert.Du iwwerlegschd nun simulierschd: Was könnten dess bloß soi?
Was schleicht donn do klammheimlisch in unser Umwelt noi?
Im Fernseh hörschd, im Reich der Midde det enn Virus wüte, doch dess iss so weit weg vunn uns: Misse mer uns vor dem hüte?
Hätten die dort besser uffgebasst, könnt so was nett bassiere.
Zum Glick hamm mer nett dess Problem, dess sinn de Chinese ihre.Unn plötzlich werrn a in de Palz viel Leit arg krank unn sterwe.
Vunn heit uff moie liggt er do, moin Alltagsdrott, in Scherwe.
Schule, Gschäfte, Kinnergarde, alles komplett zu, im Zoo, in Tierparks unn uff Schbielplätz, kä Kinnergschrei, bloß Ruh´.
In Firme wern die Uffträg knapp unn manche duen schließe.
Am Anfang denkscht, dess iss jo doll, dess werr ich echt genieße.Manche schaffen vunn dehäm, zum Office werd´ die Kich.
Bloß sinn doi Kinner a noch do unn nerven nett bloß dich.
Mann unn Fraa hänn a mol Zores, zum Gligg nett gar so oft, doch weil merr sich jetzt schdändisch sieht, werd´a emol gezofft.
Unn darfschd dann raus zum Subbermarkt unn laafschd in Ruh´ e Schdigg, bischd´dankbar ferr dess bissel Paus´unn denkschd: Was ferr e Gligg!Unnerum do iss doi Gsischd ganz hinner Schdoff verschdeckeld, doi Fraa hott ferr dich noch ganz schnell e Mundschutzmask´ gehäkelt.
Du guggschd unn siehschd ´se trotzdem nett, die Vire, die verreggde, a im Babierkorb hoschd du gsucht, vielleicht sinn dort verschdeggde.
Unn trotzdem sinn se iwwerall bei uns do in de Luft.
Drum bleib vernünfdisch jeden Daach, sunscht wart uff dich die Gruft.A wonn’s mol nervt, du hängschd jo doch e bissel noch am Lewe.
Bischd vorsischdisch, nimmschd Ricksischd, benimmschd dich net denewe.
Unn gehschde naus, dann bleibschd du a e ganzes Schdiggel weg, vumm Nochber und de Freunde, sunschd hott alles gar känn Zweck.
Donn muss de Virus suche unn find kä Opfer mehr.
Ich stell‘ merr grad mol vor, wie wunnerbar des wär‘.
Autor:Tim Altschuck aus Kaiserslautern |
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.